PRESS RELEASE
NO.121/2023
By Puhpa MH. Tiabi,
Executive Member i/c School Education (MS)
Mara Autonomous District Council, Siaha.
Ahmiatua ta Mararâh liata Pachutuhpa zydua zana samaw ei cha hlâ ei.
Teachers’ Day he pachutuhpazy châta alynanoh peimawh kawpa special day châ ta, siku hawtizy ama pachuna kyh liata ama hriapasanazy alykheina nata siku hawti nata nôpawzy ta ama palyupalihna noh a châ.
India liata cha second president Sarvepalli Radhakrishnan pina noh 5 September he kô 1962 tawhta Teachers’ Day alyna noh ta hmâpa a vaw châ. Sarvepalli Radhakrishnan he Indian politician, philosopher nata châ thai kawpa (statesman/respected political figure) châ ta, kô 1962 tawhta 1967 chhôh ta president of India a vaw châpa a châ.
Pachutuhpa dopa nata siapa ta cha siku hawtizy hlâta châ achu hluh via ta, siku hawtizy siku O liata a pachu hlâta O liata thata achu tua tyh ta, pahnie kawpa nata thai kawpa ta â chu khai tawhta siku hawtizy a pachu pachhuah tyh ei. Siaha District liata pachutuhpa ypa zydua chhao he hawhpa pachutuhpa châ achhuah chyu awpa ta ei châ haw hmeiseih ei.
“Hawtipa cha a siena awpa lâpi liana chata pachu u la, a machâ tita chhao siesai aw vei,” tahpa bie Biesozy 22:6 liata eima hmôpa hawhta, siku hawtizy ama hawtita tawhta Khazohpa pahnosa ta, Sunday School kiazy ama papeimawhsa thei n’awpa ta nôpawzy ta ama hawtita tawhta achhyna Ozy pangaisa hluh awpa he a za peimawh ngaita kaw.
Nôpaw châta peimawh kawpa cha ochhôh liata khihsatôhtu kyh lia heta hawti hmiakô liazy ta reikah hmâhdâhzy achado ta, hawti hmiakô liata reikah pualeipazy hmâh rai rai lei awpa a châ. Hawtizy heta nôpaw reikah nata yzia dâh he copy chatlie kaw ei ta, cha hnaihta, hawti hmiakô liata cha asohsi kaw awpa a byuh ngaita kaw.
Mahatma Gandhi chata, “Siku hawti châta achupa text book pha chaipa, ado chaipa (true text-book) cha ama pachutuhpazy hena a ama châ e,” tahpa ta a reih. Siku hawtizy heta ama nôpawzy hlâta ama pachutuhpazy rei he angiah via ei ta, chavâta, pachutuhpa maophaohna he â sâh ngaita kaw. Pachutuhpa ta siku hawtizy châ ama pachuna kyh lia heta Daotheina, Tiamana, Adona nata Siana, Ngiachhiena nata Kyhpachânazy he ama palâsa hluh kaw awpa he a za peimawh ngaita kaw.
Pachuna phapa cha râh hmahsiena thabypa châ ta, pachutuh phapazy he za achhih ei ta, palyupalih tlâh chhao ama châ hra. Hrozie tlaita pachuna phapa apietuhpazy cha rônah ei ta, za amâ chhih ngaita tyh. Pachutuh phapa châ lymâ chyu awpa ta Mararâh pachutuhpa zydua zana nata khokheina sâh chaipa ei cha hlâ ei.
Ei châ ly kaw ei.
Source:
Information & Publicity Department
Mara Autonomous District Council
Siaha.
(Dated Siaha, the 5th September, 2023).
