PRESS RELEASE
NO.17/2025
SIAHA, 08 Hmypi, 2025, Pachynoh – Zâhnia târi 07.02.2025 zâ dawh 07:00Pm khata Enchante Event Hall, New Colony, Siaha liata Dr. K. Beichhua, MLA, Siaha Biatuhpa ta Basketball Tournament a pachhuahpanohpa MLA Cup 2025 Opening Ceremony ahmâhpa châ ta, Puhpa S. Lalremthanga, Dy. CEM, MADC ta khichhai laipa (chief guest) châpa ta â hmâkhei ei.
Programme he Miss Dinai Lalruatdiki ta chhihtha ta, NG. Rampuia, Asst. Secretary, SDBBA ta Abeipa lâta pavaosana devotion daihti â hmâh. Puhpa H. Vabeitha, President, SDBBA ta pasyuna bie nata welcome speech reina a hnei.
Khichhai laipa Puhpa S. Lalremthanga, Dy. CEM, MADC ta MLA CUP 2025 pahyna a hnei khai tawhta biereina a hnei.
Dy. CEM chata, “Dr. K. Beichhua, MLA Siaha Biatuhpa ta Basketball players zy châta tournament a pachhuahpanohpa he thyutliapazy a pachâzie palâsa ta, a chô liata ei ly hmeiseih. Siaha Basketball players nahzy court phapa nata court pitlohpa ama hnei leipa vâta ama rairunazy cha MADC Nôpawpazy ta khâ pahnokhei thlâh ha ei ta, basketball court tao na’wpa ta râh kawh kawpa a byuh hlei leipa vâta a tao n’awpa râh ama hmô thei ti ta Basketball court taopa awpa â chhuahzie,” a reih.
“Sports nata paritheipa he hmo a sie pakaoh thei leipa châ ta, sportsman châta paritheipa taopa he â hmie vei. Tazâ ta he programme a vaw hlaotheipazy cha paritheipa taopa hmi phaoh tlâ leipa ei chi ta, thapawh nama pachhihsa kaw,” tahpa ta khichhai laipa ta a reih.
Dy. CEM chata, “Eima râh thyutliapa sports thaipa hluhpi footballer, boxer talent hnei pha kawpazy hlaotloh thei leina chhâ chaipa cha discipline lia a châ tyh. Mawrâh nata viarâh lâzy tlô theileina chhâ chaipa cha discipline chhiepa vâta hlaotloh pathlah thei tyh veih ei. Chavâta Siaha basketballers nahzy cha discipline hnei kaw awpa nata, Siaha dei châ leipa ta State nata National level taih tlô pha awpa ta tiama kaw awpa ta,” bie a ta ei.
Laihsa HC Teresa Ngiano, Mara Idol 2024 nata Satlia Dominic (Domi) zy ta pahnie kawpa ta hlasapa ta zawpi ama palôhpahawh.
MLA CUP 2025 liata club a vaw hlao theipazy Jersey palâhâhna cha Club Ambassadors nahzy ta hnei ei ta, Pool Draw he Satlia T. Samuel Rochamliana, Technical Secretary, SDBBA chhihthana ry liata hneipa a châ.
Puhpa T. Beihrochhua, Vice President, SDBBA ta vote of thanks reina a hnei khai tawhta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
