PRESS RELEASE
NO.13/2024
SIAHA,09 Hmypi 2024, Chutynoh – Atanoh dawh 10:30 AM pa ta Laila Hall, College Vaih, Siaha liata Lorrain English School, Siaha Silver Jubilee celebration programme â hmâhpa châ ta, Puhpa S. Lalremthanga, Deputy CEM, MADC cha khichhai laipa (chief guest) châpa ta â hmâkhei ei.
Programme he Miss K. Thluaki, Teacher LES ta chhihtha ta, Rev. Chhuakhu Khithie, Executive Secretary i/c Education, ECM Assembly ta Abeipa lâta pavaosana devotion daihti â hmâh.
Puhpa S. Lalremthanga, Dy. CEM, MADC chata, “Atanoh he Silver Jubillee eimâ hmâh theina chhâpa cha he su liata avypa zydua ei chi ta nama pahno nahta ei pangiasa, eima Awnanopa ta School phapa padua awpa he khoh kaw ta, pachâna pahso kawpa hmâhpa ta Khazohpa lâ liata thlahchhâpa ta kô 1999 khata he School he ECM Awnanopa nôpawpazy ta ama vaw paduapa châ ta, Khazohpa ta Pachutuhpa pha kawpazy nata Students pha kawpazy miah pie ta, ECM Awnanopa nôpawpazy nata Pachutuhpazy hriapasana vâ deita ta atanoh Silver Jubilee â hmâh theipa eima châ. Ama chôh lâ liata alynabie ei reih hmeiseih,” tahpa ta a reih.
“Tiamana lâ liata chhao atahmâ ta he School liata a hria ngâhaipa nata a vaw hria awpazy pachâna pahsi viapazy hmâhpa ta nata chyhsapa thaina, pahnona khô lâ liata Khazohpa tawhta thaina sona hiah lymâna chôta he school he nama siekhei lymâ awpa ta ei châ haw ei. Eima râh, Mararâh châta pahnaingiah kawpa ta hria lymâ awpa nata Mararâh châta byhnâ châ achhuah lymâpa ta tiama kawpa ta hria lymâ awpa ta khokheina ei cha hlâ ei,” tahpa ta Dy. CEM ta a reih.
Puhpa MH. Tiabi, EM i/c Education (M/S), MADC cha guest of honour châpa ta â hmâkhei hra ei.
ISSUED BY:
Information & Publicity Department
Mara Autonomous District Council
Siaha.
