PRESS RELEASE
No.62/2024
SIAHA, 27 Thlazoh, 2024, Hriaheinoh – Atanoh dawh 11:00 AM kha ta DIET Hall, Tlâhpi, Siaha liata Pre Service Trainees Union, DIET, Siaha pachhuapanohpa Graduation Day cum Freshers’ Social, District Institute of Education and Training (DIET), Siaha programme âhmâhpa châ ta, Puhpa N. Viakhu, Hon’ble Chairman, MADC cha khichhai laipa (chief guest) châpa ta â hmâkhei ei.
Programme he Sir Sahlô Bôhia, Principal Incharge, DIET, Siaha ta chhihtha ta, Samson, 3rd Semester achuhaipa ta Abeipa lâta pavaosana devotion daihti â hmâh.
DIET Choir nata Debori Vanlalhriati, 3rd Semester achuhaipa zy ta pahnie kawpa ta hlasapa ta zawpi ama palôhpahawh.
Puhpa N. Viakhu, Chairman, MADC chata, atanoh DIET Graduation Day cum Freshers’ Social programme liata khichhai laipa (chief guest) châ awpa ta na khokhei ei chi ta, ei ly hmeiseih, tahpa ta a reih.
“DIET liata achuhaipa nata training a hnei haipazy nata a patlôhapazy ei chi he, siku hawti pachu awpa nama châpa vâta peimawh kaw ei chi ta, siku hawti châ nama pachu daihti liata pha kawpa nata siku hawtizy pipatlohsa cheingei namâ chhuah awpa he nama maophaohna lai kawpa a châ tahpa pahnona chôta, châ nama pachu awpa a châ,” tahpa ta khichhai laipa ta a reih.
“A thaisopa ta ama reih dâh ta cha, eima za pih tawhta thlâkhaoh eimâ ngia taih heta, achu awpa he chhâ thai vei na, tahpa ta ama reih. Achuna he râh hmahsiena châ tlôh ta, nâmo hlâta siku hawti he thai viapa nata hmâhtlâh châ via awpa ta nama papua awpa a byuh,” tahpa ta Chairman ta a reih.
“Siaha District liata DIET sâkha ngâlâh hnei pi ta, pasô thai ta, he liata achupa nata training a hnei haipazy ei chi heta, tiama kawpa nata palôh hnei kawpa ta namâ chu awpa a byuh. Zisu ta a pachupazy a papeimawhsa kawpa hawhta, keimo chhao Krizyhpa châ pi ta, hmo eima taona maih liata Khazoh pahnona chôta, ngâchhih kawpa nata tiama kawpa ta eima hria lymâ awpa he a peimawh ngaita kaw,” tahpa ta khichhai laipa ta a reih.
Puhpa H. Lalfakzuala, Ex-Principal, DIET, Siaha ta pasyunabie pha kawpa reina a hnei hra.
Puhpa N. Viakhu, Chairman, MADC he Official lâ tawhta Pihnô Emilyn Hlychho, PS to Chairman, MADC, Puhpa Pawsa Lava, AITO nata Puhpa Martin L. Hlychho, Cameraman zy ta ama chakaochahlâh.
Madam Vanlalchami Hnialum, Lecturer, DIET, Siaha ta vote of thanks reina a hnei khai tawhta programme pachhâsapa a châ.
ISSUED BY:
Information & Publicity Department
Mara Autonomous District Council
Siaha.
