PRESS RELEASE
NO.85/2024
SIAHA, 04 Phiata, 2024, Chutynoh – Atanoh dawh 12:00 Noon khata Government High School, New Siaha liata Siaha District Secondary School Sports 2024 Closing Function ahmâhpa châ ta, Puhpa N. Viakhu, Chairman, MADC cha khichhai laipa (chief guest) châpa ta â hmâkhei ei.
Closing Function he Puhpa Robert Zothansanga, Organising Chairman ta chhihtha ta, Puhpa T. Vabeichhuakhu, Organising Secretary ta report piena a hnei.
Puhpa N. Viakhu, Chairman, MADC chata, “Atanoh he hawhpa closing function peimawh kawpa liata khichhai laipa châ awpa ta raopa ei châpa he organising committee chôlâ liata alynabie ei reih hmeiseih,” tahpa ta a reih.
“Achuhaipazy châta he hawhpa ataopasuana pha kawpazy pachhuahpanoh theipa a vaw châpa he aly â chhih hmeiseih. Pachutuhpa nata achuhaipa nô nata paw tiamana vâ deita ta, he hawhpa ataopasuana pha kawpa a hlaotloh theipa a châ,” tahpa ta khichhai laipa ta a reih.
Chairman chata, “Atahma ta achuhaipazy ei chi he, eima châ pahniehnapa châ ei chi ta, tiama kawpa ta achu ta, hlaotloh cheingei achhuah ta, chyhsa pitlohpa nata hmâtlâh châpa namâ chhuah chyu awpa ta ei cha pasyu ei,” tahpa ta a reih.
“Paritheipa tao tlâ lei awpa ta cha pasyu ei na ta, he hawhpa ataopasuana pha kawpa liata nama participate theipa chhao he paritheipa adyuhna chikha a châ tahpa nama pahno awpa a peimawh ngaita kaw,” tahpa ta chairman ta a reih.
“Eima chheipâh liata apahrâpazy he paritheipa a zuahpa nata a taopa hluh kaw ei ta, chavâta namâ sohsi kaw awpa byuh ta, Krizyhpa eima châpa my leipa ta paritheipa eimâ dyuh lymâ awpa he a peimawh ngaita kaw. Nama chuna kyh liata Khazohpa hmiapasah lymâna chôta tiama kawpa ta achu lymâ awpa ta khokheina ei cha hlâ chyu ei,” tahpa ta khichhai laipa ta pasyunabie pha kawpa achuhaipazy hnohta a reih.
Beirakhochhi ta pahnie kawpa ta hlasapa ta zawpi a palôhpahawh.
Puhpa N. Viakhu, Chairman, MADC he Official lâ tawhta Puhpa Pawsa Lava, AITO, MADC, Puhpa Martin L. Hlychho, Cameraman nata Beichhitha Fachhai, Security, MADC zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
