PRESS RELEASE
NO.103/2024
SIAHA, 04 Phiapi, 2024, Hriatuanoh – Atanoh dawh 10:30 AM khata MADC Golden Jubilee Hall, Siaha liata 59th MSO Day Celebration Programme ahmâhpa châ ta, Puhpa N. Viakhu, Chairman, MADC cha khichhai laipa (chief guest) châpa ta â hmâkhei ei.
Programme he Puhpa T. John Tennyson, Vice President, MSO Gen. HQ ta chhihtha ta, Rev. K. Laichhua Azyu, Moderator, ECM Assembly ta Abeipa lâta pavaosana devotion daihti â hmâh.
Elson Eliasah Notlia, President, MSO Gen. HQ, Siaha ta welcome speech reina a hnei.
Puhpa N. Viakhu, Chairman, MADC chata, “MSO aduana ei 59th Celebration Programme liata khichhai laipa châpa ta programme ei vaw hlao theipa he ei ly hmeiseih,” tahpa ta a reih.
“Atanoh ta achuhaipazy ei chi he Mararâh ta hnabeiseihna nata a mokhâhpazy châ ei chi ta, nama peimawh ngâsâna tahpa he nama pahno awpa a peimawh. Chi nah pho cheihchalotuh awpa châ ei chi ta, thaina sona kyh liata pho hropa azaoh ta, hmiachhy thei awpa namâ chhuah chyu awpa a châ,” tahpa ta khichhai laipa ta a reih.
“Hmopha taona kyh liata chi hro pho hro amopâtlâh châ namâ chhuah chyu awpa a châ. Generation kaw sie lymâ awpa liata ti nah râh chhihthatuh phapa nama kaw châ lymâ awpa he eima châ hnabeiseihpa a châ,” tahpa ta chairman ta a reih.
“India râh central nata state lia rai châ sala, central service liatazy state service liatazy a hluh thei chaina hawhta tloh achhuah ta, officer châ namâ chhuah chyu awpa a châ,” tahpa ta khichhai laipa ta a reih.
“Sasyh asohsina he peimawh ngâsâ ta, mobile hria ta, amôna châh pahno khao lei, mydi thyuna châh pahno khao lei tahpa ta nama y pathleipa a châ khiahta la, nama pathleih para awpa a châ,” tahpa ta chairman ta a reih.
“Self discipline he nama pachâ peimawh kaw awpa a byuh. Phai lâ châ achupa thokha achu pha khoh leipa y tyh ei ta, nô nah paw ta riethei kawpa ta chyh ei ta, nô nah paw rietheinazy pachâ leipa ta khoh dâh hawhta ypâ y tyh ei ta, a pei ngâsâ. Tiama kawpa ta châ achu ta hlaotloh cheingei namâ chhuah chyu awpa a châ,” tahpa ta khichhai laipa ta students hnohta pasyunabie a reih.
“Self discipline nama maintain lymâ vei khiahta la, hlaotlohna to thei leip’aw ei chi ta, Biehrai liata na khi tawhta mathlai a pua vei khiah nie awpa hmô veih ei chi miah tah ta, chavâta nama tiama kaw awpa a byuh,” tahpa ta khichhai laipa ta a reih.
ISSUED BY:
Information & Publicity Department
Mara Autonomous District Council
Siaha.
