Puhpa MH. Tiabi, EM, MADC ta BML Hlaphôh areipasuana programme hmâkhei

SIAHA, 21 Thlarâh, 2023, Pobienoh – Atanoh dawh 10:30 AM khata Forest Hall, MADC, Siaha liata Board of Mara Literature (BML), MADC pachhuahpanohpa Middle School Achuhaipazy châta BML Hlaphôh areipasuana programme liata Puhpa MH. Tiabi, EM i/c M/S MADC & Chairman, BML cha khichhai laipa (chief guest) châpa ta â hmâkhei ei.

Programme he Puhpa JB. Chozah, Sr. EO (M/S) & Sectetary, BML ta chhihtha ta, Puhpa Laicho Notlia, Vice Chairman, BML ta thlahchhâna ta daihti a pathao. Recitation Areipasuana liata Pihnô Irisha Thlyutha ta pahnie kawpa ta a host. Puhpa L. Beimokhai, Editor, BML ta report piena a hnei.

Puhpa MH. Tiabi, EM chata, “Mararâh he Khazohpa ta miah piepa châ ta, eima pasô kaw awpa a byuh. Noh-aotlâh khih liata Mara reih achuna pahy pi ta, VC Court House liata achu tyh ei ta, Mara reih pasôpa ama vaw hluh kawpa vâta hall liata a tlôh veih ei,” tahpa ta a reih.

“Mara Hlaphôh areipasuana programme zy pachhuahpanoh theipa a vaw châpa he ei ly hmeiseih. Khazohpa ta reih miah piepa Mara reih he eima pasô kaw awpa byuh ta, eima pabohsa lymâ awpa a byuh,” tahpa ta EM ta a reih.

“Mara reih Hlaphôh he kei mo pakha pachâ dâh ta la, khizaw hlaphôh liata angia chaipa a châ. Vârâh eima kiah daihti liata khizaw liata eima hneina sôh, o nata lyu, etc achei thai’pa châ tlâ leipa ta, eima reih Khazohpa ta miah piepa Mara reih ngâlâh he Vârâh eima kia tita eimâ chei thei’pa a châ,” tahpa ta khichhai laipa ta a reih.

“Khazia ei reih ei pahlei aw, chô Khazoh eina piepa cha, tahpa hawhta Mara reih he eima pasô kaw awpa a byuh. Atahmâ Executive Member i/c MS ei vaw châ tawh heta Board of Mara Literature (BML) he a peimawhzie ei za pahno. Mara reih eima cheih vâ deita ta District Council a hneipa eima châ. Chavâta, eima reih Mara reih pasô via lymâ ta, BML chhao eima papeimawhsa via lymâ awpa a byuh,” tahpa ta BML Chairman tah a reih.

“Atanoh he su liata Hlaphôh areipasuana liata a vaw hlaopa zydua, nama zydua ta sâkhana châ khai thai’pa châ hra vei u la, nama vaw participate vâ hra hro ta, châ ly kaw ei na ta, Mara reih hmahpasiesa n’awpa châta contribution piepa hawhta namâ pachâ chyu awpa ta ei châ haw ei,” tahpa ta EM tah a reih.

He hlaphôh areipasuana liata judges zy cha:- Pihnô P. Chaki, President, MCHP, HQ, Siaha, Pihnô Lynn H. Ngohei, Secretary, ECM KHP, HQ, Siaha, Pihnô Patricia T. Azyu, Social Welfare Officer, MADC zy ama châ. Puhpa Z. Siachô, Editorial Board Member, BML he recorder a châ.

Atanoh Hlaphôh areipasuana liata a vaw hlao theipa he Middle School 22 a châ.

He hlaphôh areipasuana liata sâkhana a lapa cha Jenesis Nuna, Chhaolô Middle School châ ta, sânona cha S. Ngopawrili, Tipa Diary M/S châ ta, sâthôhna cha Jessica B. Nana, Amôbyuh ‘B’ M/S a châ.

Consolation prize alapazy:-