PRESS RELEASE
NO.102/2024
SIAHA, 01 Phiapi, 2024, Chutynoh – Atanoh dawh 12:00 Noon khata Social Welfare Department, MADC pachhuahpanohpa Vârâh Vâna Hlabu cha Puhpa M. Laikaw, Hon’ble CEM, MADC ta MADC Golden Jubilee Hall, Siaha liata a palâhâh.
Programme he Pihnô Patricia T. Azyu, SWO, MADC ta chhihtha ta, Rev. AZ. Beirakaw, Executive Secretary, Social Mission & Development, ECM Assembly ta devotion daihti â hmâh.
Puhpa M. Laikaw, Hon’ble CEM, MADC chata, “Marapazy ta eimâ ngiah kawpa ‘Vârâh Vâna Hlabu’ pha kawpa Social Welfare Department, MADC ta a vaw pachhuahpanoh theipa he a rônah tah na ta, ei ly hmeiseih. Department liata chhihthatuhpa nata Staff zy amâ piepasana he reithai tlâh châ hmeiseih ta, ama chô lia chhaota alynabie ei reih hmeiseih,” tahpa ta a reih.
“Mara Autonomous District Council liata Social Welfare Department he baongiahpazy bao ta, deichhyna rai hriatuhpa, Nôpi Pawpipazy châta eimâ bôchhâ ngaitapa châ ei ta. He hlabu heta yrupazy palôhpahawhna liata maniah a phahnaikhei kaw nahta hnabeiseihna hnei na ta, ei ly ngaita,” tahpa ta CEM ta a reih.
“He hlabu he Khazohpa reithaina nata mâchhiesapazy châta thlalôhna nata ngiapâna liata laiseihna vaw châ sala, tahpa khokheina ei hlâ hmeiseih,” tahpa ta he Hlabu palâhahtuhpa ta a reih.
CEM chata, “Marasawpi he mo hropa riethei kawpa ta hmotao chiehpa, a taopha dâh, ama taopha dâh, tahpa ta encourage achhuah leipa ta, reipachhie sai achhuah pi ta, he he eima pathleih bâ awpa a byuh. Ataotuhpazy ta ama taochhei tlamawpa a y pathleipa chhaota palôh pathaih kawpa ta, ataotuhpa pangaipa ta tlyma, ataotuhpazy (concerned department), a rei n’awpa dopa platform liata reih leipa ta, social media liata thâchhie thata eimâ reih tyhpa he pathleih bâh sih la,” tahpa ta a reih.
“NGOs zy chhao baongiahna liata abao raihrie ta, hriaparaohna phapa hnei ta, an encourage thai raihrie achhuahpa ta raihriapa he hmahsiena chhao a y lymâ aw,” tahpa ta CEM ta a reih.
Puhpa T. Seido, EM i/c Social Welfare, etc., MADC chhaota biereina hnei hra ta, 12th Term MADC, Social Welfare Department ta eima râh liata py lai chaipa MTP Platinum Jubilee atheithlâh ha n’awpa châta he ‘Vârâh Vâna Hlabu’ he vaw pachhuahpanoh pi ta, daihtizy â vaw cha-ie kawpa vâta, kho akhi leinazy chhao a hluh kaw thei aw. A hmâhtupazy nama pachâthaina eima châ haw hmeiseih,” tahpa ta a reih.
ECM Assembly Choir ta pahnie kawpa ta hla ama paryh. Puhpa John Beizachhi Phuto nata Satlia Pachho Notlia zy ta pahnie kawpa ta hlasapa ta zawpi ama palôhpahawh.
Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
