PRESS RELEASE
NO.16/2025
SIAHA, 05 Hmypi, 2025, Pakhynoh – Atamy dawh 11:00Am khata Golden Jubilee Hall, MADC Siaha liata Mizoram Cleanliness Competition 2024 liata sâ 2-na alyna programme ahmâhpa châ ta, Puhpa M. Laikaw, Hon’ble Chief Executive Member, MADC cha khichhai laipa (chief guest) châpa ta â hmâkhei ei.
Mizoram sawhkhâ ry liata Urban Development & Poverty Alleviation (UD&PA) Department pachhuahpanohpa Mizoram Cleanliness Competition 2024 liata Siaha khihpi ta District Headquarters Category liata khihpi pathaih chaipa lymâ sâ 2-na a dao.
Programme he Puhpa Vanlalchhuanliana, SDO (s) & DPO ta chhihtha ta, Rev. Thylua Hlychho ta Abeipa lâta pavaosana devotion daihti â hmâh.
Puhpa M. Laikaw, Hon’ble CEM, MADC chata, atanoh he su liata avypa zydua MADC mohta alynabie ei cha hlâ chyu ei. Kô 2023 Mizoram Cleanliness Competition lia khata Siaha khihpi sâ 3-na eima la no khata 2024 liata sâ 1-na eima la khiahta la kyhchhina ta ei châ lypa aw ei, ei tahpa hawhta, atakô 2025 Mizoram Cleanliness Competition liata 1st Position nama la khiahta cha kyhchhina ta ei châ lypa aw ei,” tahpa ta a reih.
“Mychareih ta mydi thlahchhâ khai tawhta Siaha khihchhôh liata walk tyh na ta, atanoh he programme liata LAD, MADC liata hriapa Sweepers zy y lei hmah y hra ei sala, mydi ta thyu ei ta, Siaha khihchhôh tiama kawpa ta pathai tyh ei ta, ama chô liata ei ly hmeiseih,” tahpa ta CEM ta a reih.
CEM chata, Pihnô S. Lalmuanpuii, Sr. LAO, MADC hnohta alynabie reih ta. Mydi ta Siaha khihchhôh liata ei walk nota Sr. LAO a tyh tyh na ta, a hrialâhpazy nata spot verification zy hnei tyh ei ta, a chô liata ei ly hmeiseih tahpa ta a reih.
“MADC Office lia heta chanô Head of Department (HoD) vaw y hôlô ei ta, tiama kaw sai ei ta, sia kaw sai ei ta, tahmâ chhao Sr. LAO chanô châ ta, a tiamana nata a hmotao phana result cha hmô’pa a vaw y haw, aly’pa a châ hmeiseih,” tahpa ta khichhai laipa ta a reih.
“Pathaihna liata sâ 2-na eima châ theipa he, LAD, MADC nata DC Office, Siaha, UD&PA Department liata hriapa zydua nata VCs, NGOs, Awnanopa, Siaha khihpi liata pahrâpa zydua nata Mara zawpi hriapasana vâ châ ta, ei châ ly hmeiseih ei. Kô 2025 liata cha he hlâta pha viapa ta hria sih la, sâkhana châ achhuah chyu suh vy,” tahpa ta CEM ta zawpi programme avaw hlao theipa zydua hnohta ahawna a tao.
“Eima sawhkhâ 12th term MADC heta Maraland new vision hnei pi ta, eima pachâ peimawh kawpa cha: NGOs zy, Awnanopazy, State Department zy, Central Department zy nata hriaparaohna phapa hnei he eimâ chhuah chaipa a châ,” tahpa ta CEM ta a reih.
“Zawpi lâta pathaihna kyh liata awareness hnei hluh he peimawh kaw ta, news editor zy ta pathaihna lâchhâh châ roh hluh via awpa ta ei châ haw ei,” tahpa ta khichhai laipa ta ahawna a tao.
“Siaha khihchhôh liata sidedrain he pua kaw sai ta, VCs zy khata hmah vaw la via u la, Siaha khihchhôh liata pahrâpa zydua sidedrain pathaihna kyh liata tiama papua via ei suh u,” tahpa ta CEM ta ahawna a tao.
CEM chata, Opa lyuhri liata vao-o sa ta vao zao pasai leipa châ ta, LAD, MADC lâ tawhta hmah vaw la lymâ ei ta, Opa lyuhri liata vao-o phie khai awpa a châ, tahpa ta a reih.
“Office liata dawkâh tawh ngâlâh ta raihria he a daih khao vei, a suzy tly ta pangai laih awpa he a byuh. LAD, MADC liata hriapa HoD nata a hrialâhpa zydua a suzy tly laihpa cheingei ta hriapapua ei ta, ama chô liata ei ly hmeiseih,” tahpa ta CEM ta a reih.
Puhpa V L Hruaizela Khiangte, Deputy Commissioner, Siaha chhaota pasyuna bie pha kawpa reina a hnei hra.
Puhpa K. Chhuabei, EM i/c LAD, etc MADC chhaota biereina hnei ta, Civic sense pachâ peimawh a peimawhzie a reih.
Pihnô S. Lalmuanpuii, Sr. LAO, MADC & Member Secretary STSTF chhaota biereina hnei ta, pathaihna kyh liata ama hmahlanazy reih ta, pathaihna kyh liata tiama papua via lymâ peimawhzie a reih hra.
Ls. Priscilla Nôtlia nata Puhpa John Beizachhi Phuto zy ta pahnie kawpa ta hlasapa ta zawpi ama palôhpahawh.
Puhpa M. Laikaw, Hon’ble CEM, MADC he Official lâ tawhta Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.
Rev. K. Laichhua Azyu, Moderator, ECM Assembly ta thlahchhâna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
