SIAHA, 23 Patô, 2023, Hriaheinoh – Atanoh dawh 10:30 AM pa ta Local Administration Department (LAD), MADC pachhuahpanohpa Mara Autonomous District Council (MADC) ry liata Village Councils Conference Cum Training Programme cha Multi Purpose Hall, Council Vaih, Siaha liata â hmâpa châ ta, Puhpa M. Laikaw, Hon’ble Chief Executive Member, MADC cha khichhai laipa (chief guest) châpa ta â hmâkhei ei.
Programme he Puhpa K. Beingiachhie, Sr. LAO, MADC ta chhihtha ta, Rev. Dr. FC. Beichô, New Siaha Pastor Bia Biatuhpa ta devotion â hmâh. Siaha District chhôh liata Village Councils 99 y ta, atanoh programme liata VCPs 98 nata VC Secretaries 98 amâ vaw hlao thei.
Puhpa John Beizachhi Phuto nata Ls. Jessica Ngody Hlychho zy ta pahnie kawpa ta hlasapa ta zawpi ama palôhpahawh.
Programme he first session nata second session ta pachhaihpa châ ta, second session programme he training daihti ta â hmâpa châ ta, second session programme he Puhpa C. Mochono, Asst. LAO, MADC ta a chhihtha.
Puhpa M. Laikaw, CEM, MADC chata khihto VCP zy ei chi he khihtlâh chhihtha ta, ryureih awpa ta kô pangawh (5) châta atlyhpatlopa châ ei chi ta, tiama kawpa nata ngâchhih kawpa ta rai hria chyu awpa ta â haw ei.
“Mararâh khih to liata Nôhmei hârapazy deichhy lymâ ta, kyhpachâ kawpa nata dao kawpa ta nama mohôh lymâ awpa ta ei châ haw ei,” tahpa CEM ta a reih.
CEM chata âdona (justice) papeimawhsa ta dâh nah phôh pabeisa chai ta, tiama kawpa ta raihria ta “New Maraland” padua khoh awpa ta cha hrua chyu ei na ta, ryureina dopa, ryureina siapa, ngiaryhchhihpa Mararâh, etc he “New Maraland” ta â chhuahpa cha a châ, tahpa ta a reih.
CEM chata atanoh khih to tawhta VCPs nata VC Secretaries zy avaw hlao theipa zydua hnohta Job Card âdo kawpa ta tao ta, Job Card phusâ hmâpa ta khihtlâh châta rai nama hria daihti liata tiama kawpa nata ngâchhih kawpa ta nama hria chyu awpa ta ei châ haw ei, tahpa ta a reih.
Khaichhai laipa chata, “Mararâh khih to liata ti nata iepazôsâna âvao pathaihna, hri-iah pathaihna châta khihtlâh âvao pathaihna (sanitation) papeimawhsa ta, school O chhao nama papeimawhsa chyu awpa ta ei châ haw ei,” tahpa a reih.
CEM chata, “Maraland Anti Drugs Committee chhao avaw duah ta, Mararâh khih to VCP nata a hrialâhpa zydua, NGOs nata Awnanopa zydua hriaparaohna phapa hneipa ta â dyuh lymâ awpa ta ei châ haw ei,” tahpa ta a reih.
Guest of honour Puhpa K. Chhuabei, EM, LAD, MADC chata India sawhkhâ phana zawhzi ta atahmâ cha Mararâh khih to liata ti connection hnei pha kaw bâ pi ta, chavâta, tizy asi hluh ta, pathaihna eima papeimawhsa via lymâ awpa he peimawh kaw ta, chavâta, pathaihna nama vaw pachâ peimawh via lymâ awpa ta ei châ haw ei, tahpa a reih.
EM chata khih to VCP zy hnohta education papeimawhsa ta khih to liata sanitation committee zy padua ta, ti nata iepazôsâna âvao pathaina, hri-iah pathaihna châta khihtlâh âvao pathaihna (sanitation) chôchâh reih hluh via lymâ awpa ta atanoh programme a vaw hlao theipa zydua hnohta ahawnabie, a reih.
Second session training daihti liata resource person Puhpa K. Beingiachhie, Sr. LAO, MADC chata “Village Council Administration” tahpa topic hmâpa ta pahnie kawpa ta VC dâh nah phôh siezie training a vaw hlao theipazy hnohta training a pie.
Resource person Puhpa Henry PL Hnaihly, SO, MADC chhaota “Sanitation & Animal Control” tahpa biepipa hmâpa ta training a pie hra.
Resource person Puhpa F. Lalremchhunga, DPM chata “15th Finance Commission GRANTS” biepipa hmâpa ta training a pie.
Resource person Puhpa Er. Viasai Solo, E.E. (PHE) WETSAN DIVISION, Siaha ta “15th Finance Commission, GRANTS (TIED PORTION) tahpa biepipa hmâpa ta traning a pie hra.
Resource person Pihnô CTS Hlychho, HA (LAD), MADC chata “Mizoram Finance Commission GRANTS” tahpa biepipa hmâpa ta training a pie hra.
Puhpa S. Rakhai, LAO, MADC ta vote of thanks reina a hnei khai tawhta Abeipa thlahchhâna reihparaohpa ta daihti pachhâsapa a châ. LAD, MADC zy ta dinner pachhuahpanoh ei ta, aly kawpa ta dôh khohpa a châ.
With inputs from:
Information & Publicity Department
Mara Autonomous District Council
Siaha.
