PRESS RELEASE
NO.07/2025
SIAHA, 17 Nawh, 2025, Chutynoh – Atanoh dawh 11:00 PM khata Puhpa K. Chhuabei, EM i/c LAD, MADC ta MADC Golden Jubilee Hall, Siaha liata Awareness on GPDP and PM-Vishwakarma Cum Work Order Release na programme â hmâkhei ei.
Programme he Puhpa F. Lalremchhunga, DPM, LAD ta a chhihtha.
Puhpa K. Chhuabei, EM, LAD, MADC chata, atanoh he programme a vaw hlao theipa khihto VC nata VC vyuhpa ta avaw hlao theipazy, LAD, MADC nata DC Office Siaha tawhta avaw hlao theipa zydua hnohta alynabie a hlâ chyu ei.
“Kô thiehpa kô 2025 Abeipa ta miah tlôkhei ta, aly’pa a châ hmeiseih. Atanoh he su liata avypa zydua khitlâh châta rai nama hriana kyh lia zy, Awnanopa liata Khazohpa nama chakaona kyh liata zy, khitlâh hmahsie n’awpa châta rai nama kaw hria lymâ n’awpa kyh liata Abeipa ta cha ypâ lymâ ei sala, kei chhaota a pha kawpa ta nama hria lymâ thei n’awpa ta khokheina ei cha hlâ chyu ei,” tahpa ta EM ta khokheina a hlâ chyu ei.
EM chata, eima râh he thata hmahsie ta, eima hawti nota lâthlôh chhiezie zy pachâ ta la, tahmâ cha Motor lâthlôhzy a vaw pha kaw bâ. He tlupo ta hmahsiena chatlie kawpa eima topa nata daopa zydua he keimo eima hriapapuapa cha a chyhta châ ta, a hluhvia he cha India sawhkhâ phana vâ zy, Mawrâh sawhkhâ phana vâzy nata District Council sawhkhâ phana vâzy a vaw châ, tahpa ta a reih.
“India sawhkhâ he a chakichakô liata ypa chhao kyh a pachâ hmeiseih ei tahpa he â lâpasia hmeiseihpa a châ. India sawhkhâ chô lia zy, State sawhkhâ chô lia nata District council sawhkhâ chô liazy alyna cha eima pahno via lymâ awpa he a za peimawh ngaita kaw. Khazohpa hnohta alynabie eima reih hluh via lymâ awpa he a peimawh ngaita,” tahpa ta EM ta a reih.
“Atakô kô thiehpa 2025 tawhta la khih to VC zy â do kawpa ta raihria chyu awpa ta ei châ haw ei. Krizyhpa a châ leipa chhaota adona pachâ peimawh ei ta, â do kawpa ta rai ama hria khiahta la, keimo krizyhpazy chhochhi ta la â do kawpa ta rai eima hria lymâ awpa a byuh,” tahpa ta EM ta a reih.
EM chata, â do lei kawpa ta sanawh châ vâta tlyma, viasa châ vâta tlymâ ta khokhei patluapa hneipa ta raihriapa he kô thiehpa tawhta la bâhsai chyu awpa ta ei châ haw ei, Direct Benefit Transfer (DBT) ama taona chhâpazy chhao he mo to ta hmô thei chyu ei sa ama ta vâta taopa a châ, a tah.
“Eima VC zy nama vâhnei ngâsâ, Fifteenth Finance Commission sôh hluhpi kô no chhôh vaw hria ha ei chi ta, tahmâ a kô thôh n’awpa, a ei thôh n’awpa first quarter cha cha pie ha pi ta, tahmâ second installment work order eima pie awpa vaw châ ta, a pha thei chaina hawhta raihria a vaw chhuah chyu aw ei chi ta, keimo lâ tawh chhaota nama hria tlai ma, nama raihriana a pha nata pha lei cha vaw check lymâ pi ta, eima vaw moh lymâ aw,” a tah.
“Atakô kô thiehpa 2025 tawhta cha khih to pathaihna kyh liata tiama vaw papua via lymâ u la, pathaihna nama vaw pachâ peimawh via lymâ awpa ta ei châ haw ei,” EM ta a tah.
EM chata, Former President A. P. J. Abdul Kalam ta “Water scarcity would be a big problem in the future and that future wars could be fought over water” a tahpa hawhta Ti rairuna eimâ ty lei n’awpa ta thata hmah vaw la lymâ ula, thozy mohôh pha ta, tihnawh kiapâh liata thozy pabohsa via lymâ awpa a peimawhzie, a reih.
Puhpa Thomas Maratha Hlychho, SDC, Siaha chhaota biereina hnei ta, PM Vishwakarma taona kyh reih ta, Siaha District tawhta PM Vishwakarma apply-pazy pending pa a hluhzie reih ta, taopathi byuhpa taopathi ta pangia pathi chyu awpa ta atanoh khih to tawhta VC avaw hlaotheipazy hnohta ahawna a tao.
Pihnô Nazee Khailah, Sr. RSO chata, O nata lyu râh a piena kyh liata VCs-nazy ta ama pahno awpa nata tao awpa zy reipasiana nata O hmo chhiahna daihti liata Revenue Deptt., MADC tawhta pasaina la cheingei awpa a byuhzie zy nata eima râh hmahsie via nawpa châta Mararâh liata a pahrapa zawpizy ta Leimâ (Tax) pie chyu awpa a byuhzie a reih hra.
Pasyuna bie nata Vote of thanks Pihnô S. Lalmuanpuii, Sr.LAO ta reina hneita, 15th Finance Commission 2022-23 2nd Installment work order raina hneipa a châ.
Pi Hmangaihi chhaota PM Vishwakarma apply-pazy PM Vishwakarma websie https//pmvishwakarma.gov.in liata login dâh nata applicant details moh dâhzy tanoh programme avaw hlao theipa VC zy a chhopasia ei.
Laihsa Dina-i nata Puhpa John Beizachhi Phuto zy ta pahnie kawpa ta hlasapa ta zawpi ama palôhpahawh.
Puhpa K. Chhuabei, EM, LAD, MADC he Official lâ tawhta Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
