PRESS RELEASE
NO.119/2024
SIAHA, 24 Phiapi, 2024, Abeipanoh – Zâhnia târi 23.11.2024 (Pachynoh) zâ dawh 6:30PM khata MADC Golden Jubilee Hall, Siaha liata Mara Hlasa Py, General Headquarters, Siaha pachhuahpanohpa Mara Idol Season – 7, 2024 Top 10 ataopasuana (Mara Nite) programme ahmâhpa châ ta, Puhpa M. Laikaw, Hon’ble CEM, MADC cha khichhai laipa (chief guest) châpa ta â hmâkhei ei.
Programme he Puhpa John Beizachhi Phuto, President, MHP General Headquarters, Siaha ta chhihtha ta, Rev. Beipisa Miehlo, Siaha Vaihpi Biatuhpa ta Abeipa lâta pavaosana devotion daihti â hmâh.
Puhpa M. Laikaw, Hon’ble CEM, MADC chata, “Mara Hlasa Py, General Headquarters, Siaha ta Mara Idol Season 7 pachhuahpanoh ta, atazâ Top 10 ataopasuana (Mara Nite) programme liata khichhai laipa châ awpa ta raopa ei châpa he organising board zy chô lâ liata alynabie ei reih hmeiseih,” tahpa ta a reih.
“Top 10 liata atlohpa zydua hnohta alykheina cha hlâ ei na ta, buabâna tymâna y leipa ta a chhâna taih nama tlô chyu thei n’awpa ta khokheina ei cha hlâ chyu ei. Mara chi nah pho he Khazohpa ta a ei hrâh kawpa ta paduapa châ pi ta, Khazohpa ta Mongyuh râh tawhta Missionary miah vaw tuapa ta, District Council kô 50 vaw sie pi ta, eima Awnanopa kô 100 hlei vaw sie pi ta, Mara chi nata pho phopi ta padua ta palaiseihsa lymâ awpa he eimâ chhuah chyu awpa a châ,” tahpa ta khichhai laipa ta a reih.
“Mara chi nata pho palaiseihsa ta pabohsa lymâ awpa he eima maophaohna laichaipa châ ta, literature liata hmah eima sie lymâ’pa byuh ta, hla nata bie lia chhao khizaw asosâh lymâna hawhta eima laiseih lymâ awpa a byuh hra. Mara Hlasa Py â vaw duah tawhta Mara Idol zy pachhuahpanohpa ta hlasa thaipa hluhpi talent hneiphapazy thaohpapua ha ei chi ta, atanoh ta Mara Idol nama taopa he a chhâna châ leipaw ta, nama tao via lymâ awpa ta nama palôh ta namâ vaw mâ chhielie awpa ta bie ei cha ta ei,” tahpa ta CEM ta Mara Hlasa Py hnohta ahawna a tao.
“MADC Golden Jubilee Hall he eima sôh ta â pha leina chôta tao hualua pi ta, thyutliapazy he ta hmâh phahnai ei sala tahpa he eima kho chaipa a châ. Mara Hlasa Py ta he MADC Golden Jubillee Hall he Mara Idol ataopasua n’awpa châta eima hmâh khohna ama ta vâta eima Official programme peimawhpa chalihsapa ta, tahma training peimawh kawpa eima hnei ngâna chôta, chi nata pho pabohsatuhpa nama châpa vâta pachâ peimawh pi ta, eima cha pahmâsapa ei a châ,” tahpa ta khichhai laipa ta a reih.
CEM chata, “Art & Culture Department, MADC he kei ku liata ypa châ ta, châ rohthaipa châ ngâlâh châ leipa ta, next budget liata la, Hla a phi thaipa châta sponsorship ama hnei thei n’awpa ta, budget ei pachhuahpanoh paw ei. Hla a phi thaipa ta hla phi aw ei chi ta, a aony chhao ta vaw pangia ei chi ta, screening board zy ta a vaw tlyh ei ta, a phapa cha hla pitlohpa ta tao awpa ta sôh nah thih a peimawh vâta a sôh nah thih kha district council ta eima cha mokhei aw. Chi nah pho hla zy, etc nama phi hluh lymâ awpa he a peimawh ngaita kaw,” tahpa ta a reih.
“Education he pachâ peimawh ta nâmo kuphei ta aduah papua achhuahna palôh nama hnei lymâ awpa ta ei châ haw chyu ei,” tahpa ta CEM ta programme avaw hlao theipa zydua hnohta ahawna a tao.
Mara Idol Season – 7, 2024 Top 10 zy cha:-
- Beizawzisâ Vytuchhô (Thiahra)
- Angeli Marapawpi (Palâ)
- HC. Marphyna (Siaha Vaihpi)
- Dezili Bohia (Khôpai)
- HC. Ngôsua (Khôpai)
- J. Vahneisô (Siasi)
- Abeneko (Heimata)
- Pricilla Notlia (Chhaolô)
- HC. Teresa Ngianô (Meisavaih West, Siaha)
- FC. Siteite (Lialaipi)
- Gospel Byhnâdaorili Azyu (Siahatlâh).
Mara Idol Season – 7, 2024 Top 10 ataopasuana (Mara Nite) he T. Cassidy nata N. Beichhotha zy ta pahnie kawpa ta ama host. Judge châta raopazy cha Puhpa L. Khuly, Puhpa Reuben C. Beikypacha nata Pihnô T. Merisa zy ama châ. John Litus ta pahnie kawpa ta hlasapa ta zawpi a palôhpahawh.
Puhpa M. Laikaw, Hon’ble CEM, MADC he Official lâ tawhta Puhpa John M. Beilaisei, PS to CEM, MADC, Puhpa Pawsa Lava, AITO, MADC nata Puhpa Martin L. Hlychho, Cameraman zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
