PRESS RELEASE
NO.91/2024
SIAHA, 15 Phiata, 2024, Hriaheinoh – Atanoh my dawh 11:00 AM khata MADC Golden Jubilee Hall, Siaha liata Law & Judicial Department, MADC pachhuahpanohpa Mara Chanô Py (MCHP) Town Branch Chhihthatuhpazy châta Legal Awareness Programme cum Sanitation Campaign ahmâhpa châ ta, Puhpa M. Laikaw, Hon’ble Chief Executive Member, MADC cha khichhai laipa (chief guest) châpa ta â hmâkhei ei.
Programme he Puhpa H. Vabeikhai, ACO, L&J Dept., MADC ta chhihtha ta, Pihnô K. Nozah, Office Superintendent, L&J Dept., MADC ta Abeipa lâta pavaosana devotion daihti â hmâh.
N. Beinothie, Advocate ta keynote address/paper present “The MADC (Marriage and Divorce Act), 2024 a hnei. H. Priskili ta hlasapa ta zawpi a palôhpahawh.
Puhpa M. Laikaw, CEM, MADC chata, Legal Awareness Cum Sanitation Campaign for MCHP Town Branch Leaders 2024 programme liata khichhai laipa châ awpa ta a khokheituhpazy hnohta alynabie, a reih.
“Hlâno manô mapaw daihti liata cha chanôzy he mohpahnai viana za hnei tyh ei ta, atahmâ deikua cha chanô mohpahnai viana he za y tu khao vei. India sawhkhâ chhaota chanô duahmo pasâh ta, papha via lymâ â chhuah,” tahpa ta khichhai laipa ta a reih.
“Executive Committee of the Mara Autonomous District Council, Siaha ta â pyhkheipa Mara Pho Dâh (The Mara Customary Law) a bu (châbu) ta Law & Judicial Department, MADC, Siaha ta a vaw publish theipa he aly â chhih hmeiseih ta, he dâh he hmâpa ta zyh chyu awpa ta atanoh ta he programme a vaw hlaopa zydua hnohta,” CEM ta a hawna a tao.
“Legal awareness he peimawh kaw ta, ti nata iepazôsâna a vao pathaihna, hri-iah pathaihna châta khitlâh a vao pathaihna (sanitation) chhao eima pachâ peimawh kaw awpa a byuh. Khizaw a kaw sosâh lymâ ta, râh tota pathaihna lâta hmahsiena he ama pachâ peimawh lymâ. Keimo chhao pathaihna eima pachâ peimawh lymâ awpa a byuh,” tahpa ta khichhai laipa ta a reih.
“Eima râh liata a pachaipa ta chapaw thyutliapazy paritheipa sei liata atahpa ama hluh ngaita kaw, he hawhta eima sie lymâ khiah, mara chanôzy mara chapaw vahpa awpa y khao leipa ta chihro phohropa vahpa ta ama hnei lymâ awpa he pasaih â chhih lei kaw. NGO a vaw dua hluh kaw bâ ta, MCHP â vaw duah tawhta nama hmotao phapa hmô awpa hluh kaw ta aly’pa a châ hmeiseih, chhôhkha nôhrahnô nama châna lâ tawhta nama role a peimawh ngaita kaw,” tahpa ta CEM ta a reih.
“Eima râh hmahsiena kyh lia heta chhôhkha nôhranô maophaohna he a sâh kaw ta, Awnano lia chhao, eima Society lia chhao, nama maophaohna â sâhzie a thiehpa ta nama pahno heih awpa ta ei châ haw ei,” tahpa ta CEM ta a reih.
“Chi nata pho maophaohna he keimo chhôhto nohrahnô ku liata na â pahnieh e, tahpa he a thiehpa ta nama vaw pahno heih awpa ta vaw reih khoh na ta, Khazohpa hmiapasahna chôta, thlahchhâ lymâna chôta tiama nama vaw papua via lymâ awpa ta ei châ haw ei,” tahpa ta khichhai laipa ta a reih.
“Eima sawnah nôvah ahneina (dyhchâna) kyh lia heta keima saw, keima rei tahpa ta eima khokho ta ahneina mâ rei daihti liata khoh dâh hawhta siekhei thlâhpa he pha thai leipa ta, Mara Pho Dâh (The Mara Customary Law) hmâpa ta zyh chyu achhuah su vyh,” tahpa ta CEM ta zawpi lâta ahawna a tao.
Puhpa M. Laikaw, CEM, MADC he Official lâ tawhta Puhpa Pawsa Lava, AITO, MADC nata Puhpa Martin L. Hlychho, Cameraman zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
