PRESS RELEASE
NO.83/2024
SIAHA, 01 Phiata, 2024, Hriaheinoh – Atanoh dawh 11.00 AM khata I&PR Conference Hall, Siaha liata Mizoram Upa Pawl District Headquarters, Siaha zy ta Khawvel Upa Te Ni ei 33-na cha Puhpa T. Seido, Executive Member i/c Sports & Youth Services Department & Social Welfare Department, MADC cha khichhai laipa (chief guest) châpa ta â hmâkhei ei.
Programme he Puhpa C. Sangnuaia, President, Mizoram Upa Pawl, District HQ, Siaha ta chhihtha ta, Rev. B. Vannunsanga, LIKBK Siaha biatuhpa Pastor ta daihtiziehpa ahmâh ta, Rev. C. Valy, Treasurer, MUP, District HQ, Siaha ta Abeipa lâta pavaosana thlahchhâna a hnei.
Puhpa T. Seido, EM, MADC chata, “United Nation Organisation, General Assembly kô 1990 liata hneipa lia khata 1st October he “International Day of Older Persons” châta vaw phuah ta, atanoh taihta hmâh pazao lymâpa a vaw châ,” tahpa ta a reih.
“He noh heta khizaw liata Older Persons zy ta uhtheipazy khitlâh châta ryusôhpa ama châzie zy, uhtheipazy za amâ chhihna pasô thai a peimawhzie nata palyupalih amâ ngiahzie zy, uhtheipazy zana châh pahno a peimawhziezy zawpi lâta pachuna châta ama hmâh tyh,” tahpa ta khichhai laipa ta a reih.
“He noh peimawh kawpa liata khichhai laipa châ awpa he tlohlei a zâ tah kaw na ta, anodeikua cha paei awpa ta ei ngia nâ ryh thai tlôh leipa ta, khichhai laipa châ awpa ta na khokheituhpa zydua hnohta alynabie ei reih hmeiseih,” tahpa ta EM ta a reih.
“Kô 1995 India Indepence Day alyna noh lia khata, Prime Minister Puhpa PV. Narasimha Rao chata National Social Assistant Programme (NSAP) vaw phuah ta, cha Scheme ry lia chata National Old Age Pension Scheme (NOAPS) taopa vaw châ ta, kô 60 chô lâ châta hlao piepa a vaw châ haw,” tahpa ta EM ta a reih.
“Râh asosâh viapa liata cha kô uhtheipazy mohôhtuhpa a hneileipazy châta “Old Age Home” taopa lymâ ei ta, a mohôhtuh awpa chyhsa sia kawpa ama pie lymâ. Mawrâh lia chhao kô 1989 khata uhtheipazy mohôhna “Old Age Home” paduapa a vaw châ ha hra,” tahpa ta khichhai laipa ta a reih.
“National Social Assistant Programme hmâpa ta Social Welfare Department, MADC chhaota thlachareih Rs.500 chyhsa 1936 hnohta pie lymâpa châ ta, heih akholeipazy hnohta thlachareih Rs.750 chyhsa 374 hnohta pie lymâpa châ ta, kô uhtheipazy mohôhtuhpa a hnei leipazy châta thlachareih Rs.1,000 chyhsa 294 hnohta pie lymâpa a châ hra,” tahpa ta EM ta a reih.
EM chata, “Social Welfare Department, MADC ta Old Age Home Project a taopa cha sawhkhâ lâ pangia hapa châ ta, Khazohpa ta â ryh a tah khiahta cha hlaotlohna chhao ei ma to nahta pangiasa â chhih,” tahpa ta a reih.
Apahâ hapazy taokheina one-minute silence daihti ahmâhpa châ ta, Secretary, MUP, District HQ, Siaha ta report piena a hnei.
Laihsa R. Lalchansangi (Sangsangi) nata laihsa H. Lalramnunhlimi zy ta pahnie kawpa ta hlasapa ta zawpi ama palôhpahawh.
He programme â hmâna lia heta kô 80 chô lâ a hrohpazy hnohta lymâ raina hneipa a châ.
Puhpa RC. Chinzah, Vice President, MUP, District HQ, Siaha ta vote of thanks reina a hnei khai tawhta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
