PRESS RELEASE
NO.31/2024
TIPA, 08 PAMIH, 2024, Chutynoh – Atanoh dawh 11:00 AM pa ta Tipa Centenary Square liata Lyuva Khutla Cha-ypi 2024 âhmâhpa châ ta, Puhpa N. Viakhu, Hon’ble Chairman, MADC cha Azipa châpa ta â hmâkhei ei.
Inaugural Programme he Puhpa C. Vabeirathie, Secretary, Organising Committee ta pahnie kawpa ta a chhihtha.
Cultural Programme he Puhpa Zakaria, Tipa Bazar nata Laihsa Gospel T. Nangô, Tipa Bazar zy ta pahnie kawpa ta ama host.
Mara Machâ Py, Headquarter, Tipa ta Hladyuh pathluah ei ta, MTP Tipa Town Branches zy ta Pahyna hla (Opening song) ama paryh.
Rev. HB. Samuel, Biatuhpa, CCI (M) Tipa ‘V’ ta Abeipa lâta pavaosana devotion daihti â hmâh.
Puhpa N. Viakhu, Chairman, MADC chata, “Atanoh Tipa Sub-Headquarters ôna chhôh liata Lyuva Khutla Cha-ypi ahmâh awpa ta avypa zydua, Marapa râh nata khizaw kaoki liata Marapasaw a ypa zydua Lyuva Khutla 2024 mohta ei châ naoh ei. Lyuva Khutla Cha-ypi noh he aly ngâsâpa ta hmâh awpa ta khokheina â sâh chaipa,” a hlâ chyu ei.
“Eima pahno chyupa hawhta Lyuva Khutla he Mara Cha-ypi eima hneipa hry liata atanoh taihta eima chhy lymâpa a y chhôhpa a châ. Eima mahnô-mahpawzy kha atahmâ hawhta sawhkhâ baona ahnabeiseih veih ei, âmo kuphei ta aduahpa châ ei ta, sawhkhâ raihriapa tlyma, sôhdaohpa tlyma pakha hmahta y veih ei. Khito ta BEI hnei ei ta, ama khih beizy cha, khihsawzy ta sabai-sahawh piepa ta ryu ama pareisa, ama chysia nata amâ busai awpa zydua cha âmo kuhriapa tlai ta ama patohpatia khai. Atahmâ ta eima duahmo tawhta eima za sai khiahta la, hlâno hro nata khihsatôhtuzy kha, uahpa achhih lei kawpa, riethei achhih kawpa hawhta eima za moh thlyu aw,” tahpa ta Azipa ta a reih.
“Mahnô-mahpawzy thâtih eimâ zâ chupasia nahta la ama hro nôchâ kha pha ta pathaih ta, kyh â vaw pachâ kaw ei ta, ama palôh hâh ta, ama veih a seih ngaita. Kôtochhieh ta lyu rai hriapa ta, vâsua nohsa adaoh ei ta, rai ama hria tyh. Lyutaopa kha, ama nietluana a y chhôhpa a châ. Lyu va ei ta, ama patlô khai nahta cha, ama rai a vaw vâh ta, he daihti no heta Lyuva Khutla Cha-ypi he ama hmâh tyh. Lyuva Khutla tahpa he “Lyuva patlô, lyuva pangohpasia” tahna a châ. Lyuva Khutla he lyuva khai, Pamih (March) thlâpâ chiahchi nata âvyuh paw daihti liata hmâ tyhpa a châpa vâta satlia nata laihsazy ama thapha kaw tyh ta, ama palôh chhao â lie thei kaw tyh,” tahpa ta Chairman, MADC ta a reih.
“Mahnô mahpawzy he hriapasa ngaita ei ta, ama palôh araoh ta, kyh â pachâ ei ta, â chakuhchavei thai ngâsâ ei ta, kyh to liata amâ baokhâ lymâ. He he amâ bohna chi nata pho hawhta amâ vaw duah thei lymâna chhâ chaipa a vaw châ,” tahpa ta Azipa ta a reih.
“Atanoh keimo chhao he chi nata pho hawhta eimâ duah papua thei n’awpa ta cha, eima chahry-pabaoh thai awpa a peimawh kaw thlyu aw. He Lyuva Khutla eimâ hmâpa heta, chi nata pho hawhta hmialâ eima tôh lymâ thei n’awpa liata maniah chahrypabaohtuhpa châ sala, chi nata pho hawhta hmoto atanoh hawhta hmaohkha ta palôraoh kawpa ta eima taopa zydua he eima Khazohpa rônahna châ lymâ sala kho â chhih kaw. He Pho, Mara pho he noâh â chhih kawna miakha hnei ta, cha cha Reih pangawh (5) eima hneipa hih! Thokha pachâ hôhhia leipa ta, “Mara Pho he chi pangawh (5) eima y” tah tyh ei ta, he he a đó vei. Mara Pho he Phokha ngâlâh châ ta, Reih deikua cha reih pangawh (5) eima hnei. He Reih pangawh (5) he eima yna kaokâh reizie lymâ ta eima cheih chyu. Eima reihhlypa deikua TLÔSAI REIH a châ. He he eima zydua Reih, eima thai chyu awpa a châ,” tahpa ta Azipa ta a reih.
“Atanoh “Lyuva Khutla, 2024″ eima hmâna heta mahnô-mahpawzy tiamana, ngâchhihna, adona, riahphana, chyhsazy mohnao riah chipa ta nawhtaw ama khoh leinazy athei thlâhna chôta eima thyutlia hluhpi paritheipa sei ta a y haipazy rairuna chatôh hoh leipa vâta ngâchhihnazy, tiamana zy, adonazy, nawhtaw khohleina a pahlei khai hapa zydua ABEIPA eima Khazohpa lâ kua para ta Marapa Chi nata Pho paduatuhpa vaw châ khai awpa ta bie ei cha ta ei,” tahpa ta Chairman, MADC ta a reih.
“Tipa Sub-Headquarters Lyuva Khutla Cha-ypi liata Azipa ta na hruatuhpa Organising Committee nata khihtlâh nôpawzy hnohta alynabie reih chanei na ta, Siaha Headquarters tawhta azupa ei viasazy nata eima Officers-zy chô lia chhao alynabie ei reih,” tahpa ta Azipa ta a reih.
Puhpa T. Seido, EM i/c Sports, etc., MADC chhao biereina chyupa a hnei hra.
Puhpa Beihu Nohro, Deputy Chief Whip, MADC chhao pasyunabie pha kawpa reina a hnei hra.
Chheihlu Cultural Troop zy ta pahnie kawpa ta Awhkhypa lâ lâna pamosa ei ta, MTP Branch Theiri zy ta Khocheinô la ama lâ.
Dawlei (Darling) MTP Sub-Headquarters Myanmar nata Zyhno Cultural troop zy ta Cultural items a ngia kawpa ama pamosa hra.
VT. Nozuahzi, Tipa ta recitation reina a hnei.
Puhpa John Beizachhi Phuto, Laihsa Jessica B. Khuhly, Pihnô Vasty T. Azyu, Laihsa Brenda Mara Pawpi (Tisi), Laihsa H. Maisô, Mathew Chozah (Tipa Diary), Laihsa B. Priskily, Esther (Tipa), Crowded Head Band, Sachhua Khaimeichhô (Tipa), Night of faith band zy ta pahnie kawpa ta hlasapa ta zawpi ama palôhpahawh.
Puhpa PP. Zalena, Adviser, MTP HQ, Siaha chhao pasyunabie pha kawpa reina a hnei hra.
Atakô liata Chhivaw nata Khydi atlypatlohpazy:-
Chhivaw – N. Ngodeli, Tisi MTP Branch.
Khyhdi – B. Hrosia, Khopai MTP Branch.
Pihnô Nasia Hlychho, (Puhpa N. Viakhu, Chairman lahpinô) chhao Chairman zipa ta Tipa liata Lyuva Khutla programme a zâ hlao hra.
Puhpa N. Viakhu, Chairman, MADC he Official lâ tawhta Puhpa C. Siatha, Under Secretary, District Council Secretariat, MADC, Pihnô Emilyn Hlychho, PS to Chairman, MADC, Puhpa Pawsa Lava, AITO, MADC nata Puhpa K. Nehemia, I&P Department, MADC zy ta ama chakaochahlâh.
Tipa MTP Sub-Headquarters zy ta my pati pachhuahpanoh ei ta, DAO Quarter, MADC Sub-Headquarters, Tipa liata aly kawpa ta dôh khohpa a châ.
ISSUED BY:
Information & Publicity Department
Mara Autonomous District Council
Siaha.
