SIAHA, 06 Pamih, 2023, Hriatuanoh – Atanoh dawh 11:00 AM pa ta Forest Conference Hall, MADC, Siaha liata Land Revenue & Settlement Department, MADC pachhuahpanohpa Land Revenue & Settlement Department Technical Staffs Training pahyna programme liata Puhpa K. Hrahmo, EM i/c Revenue etc. MADC cha khichhai laipa (chief guest) châpa ta â hmâkhei ei.
Programme he Puhpa Pheiki Solo, Sr. R&SO, MADC ta a chhihtha. Puhpa N.Khumtira, SO ta technical report piena hnei ta, training he March 6 tawhta March 9, 2023 taihta hnei awpa a châ. He training he Land Revenue & Settlement Department, MADC ry liata Surveyor nata Chainman zydua châta pachhuahpanohpa a châ.
Puhpa S. Vabeihasa, RSO, MADC nata Puhpa KT. Vabeikhokhei, ASO, MADC zy ta pasyunabie pha kawpa reina ama hnei.
He training-na liata Trainer châta raopazy cha:
- Puhpa Ricky V. Beirathie, H/S
- Puhpa Reilly Kaphmingthanga, H/S
- Puhpa A. Sachhua, Senior Surveyor
- Puhpa L. Khaimawng, Senior Surveyor
- Puhpa V. Malsawmdangliana, Junior Surveyor
- Puhpa N. Harryson, Junior Surveyor
B. Priskili nata LC. Alfina zy ta pahnie kawpa ta hlasapa ta zawpi ama palôhpahawh.
Puhpa K. Hrahmo, EM, MADC ta pasyunabie a reipa tlâhpi viapazy:
Khazohpa ta Israel sawzy kyhpachâ kaw ta, anodeikua cha, Khazohpa heta Israel sawzy hlâta Marapa sawzy pi he kyh miah pachâ via khiahmaw ei za tah tyh. Chi chyh kawpa, maluh (population) chyh kawpa châ pi ta, cha liata, Khazohpa ta Mara chipho pabohsa awpa ta Missionary miah vaw tuapa ta eima vâhnei hmeiseih.
Khazohpa ta Missionary miah vaw tuapazy vâ deita ta Council a hnei theipa eima châ. Hlaozy vaw hnei pi ta eima duasu a vaw pha via vâta apalai thai’pa châ ma pi. Riethei kawpa ta eima y notahpa daihtizy za pachâpa ta apalai leipa ta, Khazohpa lâ liata alynabie reih ta, Khazohpa eimâ pahnia via lymâ awpa he aza peimawh ngaita kaw.
Land Revenue & Settlement Department, MADC lia heta Surveyor zy ei chi he peimawh kaw ei chi ta, pha kawpa ta rai nama hria awpa he a peimawh ngaita kaw. Adona he nama papeimawhsa chai awpa ta ei châ haw ei. Khazohpa byhnâ to nama khoh khiahta la, ado ngâsâpa ta rai nama hria lymâ awpa a byuh.
Râh nama thlie daihti liata chhao khokhei viapa palôhru hnei leipa ta, â do kawpa ta râh thlie ta, adona a peimawhzie nata adona he Khazohpa khozie a châzie pahno thlâh hana chôta rai nama hria awpa ta ei châ haw ei.
Ei châ ly kaw ei.
Training pahyna programme he Abeipa thlahchhâna reihparaohpa ta daihti pachhâsapa a châ.
With inputs from:
Information & Publicity Department
Mara Autonomous District Council
Siaha.
